జుక్కల్‌పై కషాయ గర్జన: జిల్లా అధ్యక్షుడు నీలం చిన్నరాజులు

బిచ్కుందలో బీజేపీ శ్రేణుల సమరశంఖం

• లక్ష్యం ‘జుక్కల్’ పీఠం: జిల్లా అధ్యక్షుడు నీలం చిన్నరాజులు

• ప్రజల్లోకి కేంద్ర పథకాలు.. బూత్ స్థాయి నుంచే బలోపేతం

బిచ్కుంద, మార్చి 21: జుక్కల్ గడ్డపై కషాయ జెండాను ఎగురవేసి, బీజేపీ జైత్రయాత్రను చాటడమే రాబోయే ఎన్నికల ఏకైక లక్ష్యమని ఆ పార్టీ జిల్లా అధ్యక్షుడు నీలం చిన్నరాజులు పిలుపునిచ్చారు. శనివారం బిచ్కుంద మండల కేంద్రంలో నిర్వహించిన కార్యకర్తల విస్తృత స్థాయి సమావేశంలో ఆయన పాల్గొని దిశానిర్దేశం చేశారు.

బూత్ స్థాయి నుంచే యుద్ధం!

ఈ సందర్భంగా చిన్నరాజులు మాట్లాడుతూ, ఎన్నికల సమరానికి కార్యకర్తలు ఇప్పటి నుంచే సిద్ధం కావాలని కోరారు. “పార్టీ బలం కేవలం మాటల్లో కాదు, బూత్ స్థాయిలో ఉండాలి. ప్రతి కార్యకర్త ఒక సైనికుడిలా పని చేయాలి” అని పిలుపునిచ్చారు. కేంద్రంలోని మోదీ ప్రభుత్వం ప్రవేశపెట్టిన సంక్షేమ పథకాలను గడపగడపకూ తీసుకెళ్లి, ప్రజల ఆశీర్వాదం పొందాలని సూచించారు. క్షేత్రస్థాయిలో పార్టీని బలోపేతం చేయడమే లక్ష్యంగా శ్రేణులు కదలాలని దిశానిర్దేశం చేశారు.

అనుకూల పవనాలు.. గెలుపే లక్ష్యం!

జుక్కల్ మాజీ ఎమ్మెల్యే అరుణ తార మాట్లాడుతూ.. నియోజకవర్గంలో మార్పు కోరుకునే వారి సంఖ్య పెరిగిందని, బీజేపీకి స్పష్టమైన సానుకూల వాతావరణం కనిపిస్తోందని ధీమా వ్యక్తం చేశారు. నాయకులు, కార్యకర్తలు సమన్వయంతో క్షేత్రస్థాయిలో దూసుకుపోతే విజయం తథ్యమని స్పష్టం చేశారు. పక్కా వ్యూహంతో ముందుకు సాగి, ప్రత్యర్థులకు గట్టి పోటీ ఇవ్వాలని కార్యకర్తల్లో ఉత్సాహం నింపారు.

హాజరైన ప్రముఖులు: ఈ కార్యక్రమంలో జిల్లా ఉపాధ్యక్షుడు రాము, నాయకులు గోనె గంగారం, శెట్పల్లి విష్ణు, మల్లాలి సుభాష్, తిప్పతుకారం, శివాజీ పటేల్, హన్మండ్లు, శ్రీకాంత్, రాజు, అరెకటికే అశోక్ సహా భారీ సంఖ్యలో కార్యకర్తలు పాల్గొన్నారు. జుక్కల్ గడ్డపై బీజేపీ జెండా ఎగురవేస్తామని శ్రేణులు ముక్తకంఠంతో నినదించడంతో సమావేశ ప్రాంగణం మార్మోగింది.