కామారెడ్డి జిల్లా, బిచ్కుంద: అభివృద్ధి అంటే రంగుల గోడలు కాదు.. అద్దంలా మెరిసే రోడ్లు అని చెప్పే పాలకులు ఒక్కసారి చిన్న దేవాడ వైపు కన్నెత్తి చూడాలి. అక్కడ రోడ్డు ఉందో లేదో తెలియని పరిస్థితి. రాళ్లమయమైన ఆ దారిపై ప్రయాణం అంటేనే గ్రామస్తుల గుండెల్లో రైళ్లు పరిగెడుతున్నాయి. దశాబ్దాలు గడుస్తున్నా, ప్రభుత్వాలు మారుతున్నా.. చిన్న దేవాడ ప్రజల తలరాత మాత్రం మారడం లేదు.
అంబులెన్స్ రావాలన్నా భయమే!
బిచ్కుంద మండలం చిన్న దేవాడ గ్రామస్తులకు ఈ రోడ్డు ప్రధాన జీవనాడి. బాన్సువాడ లేదా నిజామాబాద్లోని ఆసుపత్రులకు వెళ్లాలంటే ఇదే ఏకైక మార్గం. కానీ, ప్రస్తుతం ఆ రోడ్డు పరిస్థితి చూస్తే వెన్నులో వణుకు పుడుతోంది.
గర్భిణుల నరకయాతన: పురిటి నొప్పులతో బాధపడే మహిళలను ఆసుపత్రికి తీసుకెళ్లడం కత్తిమీద సాములా మారింది. ఆ రాళ్ల రోడ్డుపై ఎప్పుడు ఏ ప్రమాదం జరుగుతుందోనని కుటుంబ సభ్యులు ప్రాణాలు అరచేతిలో పెట్టుకుని ప్రయాణిస్తున్నారు.
కదలని 108: రోడ్డు అధ్వానంగా ఉండటంతో అత్యవసర సమయంలో 108 అంబులెన్స్లు సైతం గ్రామానికి రావడానికి వెనుకాడాల్సిన పరిస్థితి నెలకొంది.
రైతన్నల గోడు పట్టించుకునే వారేరి?
వ్యవసాయంపైనే ఆధారపడి జీవించే ఈ గ్రామ రైతులు, పండించిన పంటను మార్కెట్కు తరలించలేక సతమతమవుతున్నారు.
“మా ఊరికి రోడ్డు వేయమని ఏళ్ల తరబడి అడుగుతున్నాం. ఎన్నికలప్పుడు ఓట్ల కోసం వస్తారు.. చేతులు జోడిస్తారు.. గెలిచాక ముఖం చాటేస్తారు. మా గోడు వినే నాథుడే లేడు.”
— గ్రామస్తుల ఆగ్రహం.
అభివృద్ధి నినాదాలు కేవలం కాగితాలకే పరిమితం కాకుండా, తక్షణమే నిధులు మంజూరు చేసి చిన్న దేవాడ రోడ్డు నిర్మాణాన్ని చేపట్టాలని గ్రామస్తులు డిమాండ్ చేస్తున్నారు.
