ఎల్లారెడ్డి మండలం వెల్లుట్లపేట గ్రామంలో హనుమాన్ ఆలయ వార్షికోత్సవ వేడుకలు శనివారం అత్యంత వైభవంగా ప్రారంభమయ్యాయి. ఈ సందర్భంగా గ్రామంలో నిర్వహించిన హనుమాన్ శోభాయాత్ర భక్తజన సందోహం మధ్య కన్నులపండువగా సాగింది. జై శ్రీరామ్.. జై హనుమాన్.. అంటూ భక్తులు చేసిన నినాదాలతో గ్రామ వీధులన్నీ మారుమోగాయి.
ఉత్సాహంగా శోభాయాత్ర ఉదయం నుంచే ఆలయంలో ప్రత్యేక పూజలు నిర్వహించిన అనంతరం, స్వామివారి శోభాయాత్రను ప్రారంభించారు. రంగురంగుల పూలతో అలంకరించిన వాహనంపై స్వామివారు ఊరేగుతుండగా, యువకులు, మహిళలు, గ్రామ పెద్దలు పెద్ద ఎత్తున తరలివచ్చారు. డప్పు వాయిద్యాలు, భజన కీర్తనల మధ్య సాగిన ఈ యాత్రలో భక్తులు ఉత్సాహంగా నృత్యం చేశారు.
మూడు రోజుల పాటు ఆధ్యాత్మిక వేడుకలు ఈ సందర్భంగా గ్రామ సర్పంచ్ కొయ్యల వినోద్ రాజా గౌడ్ మాట్లాడుతూ.. ఆలయ వార్షికోత్సవాన్ని పురస్కరించుకుని గ్రామంలో మూడు రోజుల పాటు విశేష ఆధ్యాత్మిక కార్యక్రమాలు, యజ్ఞం నిర్వహించనున్నట్లు తెలిపారు. గ్రామస్తులందరూ ఈ యజ్ఞంలో పాల్గొని స్వామివారి కృపకు పాత్రులు కావాలని ఆయన కోరారు. భక్తుల సౌకర్యార్థం ఆలయ కమిటీ ఆధ్వర్యంలో అన్ని ఏర్పాట్లు పూర్తి చేసినట్లు పేర్కొన్నారు.
శోభాయాత్రతో వెల్లుట్లపేట గ్రామంలో ఆధ్యాత్మిక వాతావరణం నెలకొంది. ఈ కార్యక్రమంలో గ్రామ ప్రముఖులు, యువజన సంఘాల ప్రతినిధులు మరియు మహిళలు పెద్ద సంఖ్యలో పాల్గొన్నారు.
